Langtidsfattige familiar i Noreg

Vendepunkt for langtidsfattige familiar

Ein ny studie viser korleis familierettleiarar bidreg til varige endringar for langtidsfattige familiar i Noreg, gjennom støtte som skaper små augeblinkar og store vendepunkt i kvardagen til fattige familiar.

Her kan du lese artikkelen frå Danielsen (NLA) og Grimastad Lundberg (HVL).

Forskinga til Danielsen framhevar verdien av tid, fleksibilitet og tillit i arbeidet med familiane. 

Forsking frå professor Hilde Danielsen ved interkulturelle studium ved NLA Høgskolen, saman med professor Kjetil Grimastad Lundberg (HVL), kastar nytt lys over kvardagen til langtidsfattige familiar i Noreg. I ein nyleg publisert artikkel undersøkjer dei to forskarane korleis intensive intervensjonsprogram (program som er laga for å gripe aktivt inn i ein situasjon for å skape positiv endring), spesielt med familierettleiarar, kan påverke livet til familiar med samansette behov. Forskinga bidreg til eit veksande felt som kasta lys over barnefattigdom og sosial ulikskap i Noreg, område som stadig vekk vekkjer offentleg uro.

Innovativt program mot fattigdom

Artikkelen er knytt til innovasjonsprosjektet «Nye mønstre – trygg oppvekst», som starta i Kristiansand kommune. Dette programmet er eit forsøk på å bryte ned siloane (separate avdelingar eller sektorar som fungerer isolert frå kvarandre) i velferdssystemet i dag og gje meir heilskaplege tenester til familiar med komplekse utfordringar. Målet er å støtte fattige familiar og bidra til å redusere den negative overføringa av fattigdom frå éin generasjon til den neste.

Små skritt mot varige endringar

Studien til Danielsen og Lundberg byggjer på feltarbeid (innsamling av data gjennom direkte observasjon og kontakt med personar i deira eige miljø) og kvalitative (djuptgåande) intervju med ti foreldre som deltek i programmet. Gjennom samtalar med familiane kjem det fram korleis samarbeidet med ein familiekoordinator kan føre til både små små kvardagslege augeblinkar som kan føre til endring og bidra til større vendepunkt som kan skape varige endringar.

Den fleksible og heilskaplege rolla til familiekoordinatorane viser seg å vere avgjerande i arbeidet med å bygge tillit til familiane. Dei tilpassar seg behova i kvar enkelt familie og tilbyr både praktisk hjelp og emosjonell støtte. Fleire av foreldra beskriv samarbeidet som ei livsendrande oppleving, der koordinatorane gir den hjelpa familiane opplever at dei treng, noko som står i sterk kontrast til dei tidlegare erfaringane dei har med Nav.

Familiar med komplekse behov

Dei langtidsfattige familiane som deltek i programmet, har ofte allereie vore i kontakt med ulike delar av velferdssystemet før dei blei med. Halvparten av deltakarane har migrasjonsbakgrunn (personar som har flytta til Noreg frå eit anna land), og mange er einslege foreldre, særleg mødrer. Programmet tilpassar seg dei unike situasjonane deira og gjev eit breitt spekter av skreddarsydde tenester som skal støtte heile familien, inkludert barna.

Tillit og tid – nøkkelen til suksess

Forskinga framhevar verdien av tid, fleksibilitet og tillit i arbeidet med familiane. Sterke, tillitsfulle relasjonar mellom familiane og koordinatorane deira er avgjerande for å oppnå dei positive resultata som kan betre livsvilkåra for barna. I tillegg til dei kvalitative funna nyttar prosjektet kvantitative (målbare) metodar for å måle effekten av programmet på helse, skuleprestasjonar og arbeidsstatus for familiemedlemmene.

Gjennom artikkelen får vi eit innblikk i korleis nøye tilpassa tenester kan utgjere ein reell forskjell for familiar som elles ville falle mellom sprekkene i velferdssystemet. Det er tydeleg at programmet «Nye mønstre – trygg oppvekst» gjev håp om ei betre framtid for desse familiane, og potensialet for å bryte fattigdoms- og ekskluderingssirkelen er stort.